གཙོ་ངོས།>> ཞིབ་འཇུག>>སྟག་ངར་གཡག་ངར།

དབང་ཆེན། རྩོམ་སྒྲིག་པ།ཚེ་དཔལ། ཡོང་ཁུངས།གངས་ལྗོངས་ཉི་གཞོན་དྲ་བ། སྤེལ་དུས། ༢༠༡༦ལོའི་ཟླ་བ་༠༡ཚེས་༢༠ཉིན།

༄༅། ། སྤྲུལ་སྐུ་ལ་ངེས་པར་ལྡན་དགོས་པའི་ཡོན་ཏན་སྐོར་རགས་ཙམ་གླེང་བ།

  གྲངས་མེད་བསྐལ་པའི་ཚོགས་གཉིས་ཤིང་རྟ་ལས།  །ལེགས་པར་དྲོངས་བའི་ཕྲིན་ལས་གཟི་འོད་ཅན།  །མཚན་དཔེའི་སྐུ་མངའ་སྟོན་པ་མཉམ་མེད་མཆོག  །སངས་རྒྱས་ཉི་མ་དེ་ལ་བདག་ཅག་དད།  །དེའི་གསུངས་བརྒྱད་ཁྲི་བཞི་སྟོང་ཆོས་ཕུང་གིས།  །གཉེན་པོ་བཀའ་ཡི་དགོངས་པ་རང་དབང་དུ།  །འགྲེལ་མཛད་འཕགས་བོད་སྐྱེས་ཆེན་དམ་པ་སྟེ།  །མཁས་གྲུབ་ལོ་པཎ་ཚོགས་རྣམས་ཕྱག་གི་ཡུལ།  །མི་གྲྭར་ལྐུག་པའི་བརྟུལ་ཞུགས་མི་འཛིན་བར།  །རྫུན་དང་གཡོ་སྒྱུའི་ཟོལ་གྱིས་མ་སྦག་པ།  །མཁས་འདོད་གྲགས་པའི་དྲེགས་པ་རིང་དོར་ནས།  །དྲང་པོའི་ངག་ལས་བདེན་པའི་གཏམ་ཞིག་མོལ།  །ཞེས་ཚིགས་སུ་བཅད་པས་མདུན་བསུས་ནས་གང་གླེང་བ་བྱ་བ་ནི།   དེང་གི་དུས་འདིར་བོད་གངས་ཅན་ལྗོངས་འདི་ཉིད་མ་ཚད་རྒྱ་ཕྱི་ནང་ཀུན་ཏུ་གྲགས་སྙན་གྱི་དབྱར་རྔ་ཕྱོགས་ཀུན་ལྡིར་ཞིང་།   དད་གསུམ་གྱི་ཕྱག་པད་སྙིང་གར་ཟུམ་སྟེ་གཏན་གྱིས་འདུན་མ་དང་། ལེགས་ཉེས་ཐམས་ཅད་བཅོལ་བའི་གནས་གཅིག་པུ།  རྒྱལ་བའི་ཕྲིན་ལས་ཀྱི་འཇུག་པ་ཤར་བའི་སྤྲུལ་པའི་སྐུ་གྲངས་ལས་འདས་པ་ཞིག  བསྟན་པ་དང་འགྲོ་བའི་དོན་དུ་སྤྱང་ཀི་ཤ་ལ་རྔམ་པ་ལྟར་བྱོན་དང་འབྱོན་བཞིན་པ་ནི།  གདུལ་བྱ་དུས་སུ་སྨིན་པར་གཟིགས་པ་ལགས་པས་སྙོན་དུ་ཅི་ཡོད།   འོན་ཀྱང་འདི་ལ་ཅུང་ཟད་ཅིག་དཔྱད་ན།   སངས་རྒྱས་ཀྱི་ཕྲིན་ལས་དངོས་ཡིན་ན་བཀའ་མདོ་རྒྱུད་ཀྱི་དགོངས་པ་ལྟར།   སྤྲུལ་སྐུ་ཞེས་པ་དེ་ཆོས་ལོངས་སྤྲུལ་གསུམ་གྱི་ཟླས་ཕྱེས་པའི་ནང་ཚན་སྤྲུལ་སྐུ་དེ་ཡིན་པར་གདོན་མི་ཟ་བས།   དེའང་སྐུ་གསུམ་གྱི་ཆེ་བའི་ཡོན་ཏན་མདོ་ཙམ་ཞིག་སྨོས་ན།  ཆོས་སྐུ་ཞེས་པ་དེ་ཕྱི་ནང་གི་ཆོས་རྣམས་ཀྱི་གནས་ལུགས་ཕྱིན་ཅིང་མ་ལོག་པ་སྐྱེ་འགག་དང་།   རྟག་ཆད་འགྲོ་འོང་གཅིག་ཐ་དད་སོགས།   ངོ་བོ་གང་དུའང་མ་གྲུབ་པར་རྣམ་པར་ཇི་ལྟར་བཙལ་ཀྱང་མ་རྙེད་པའི་རང་བཞིན་།   སྤྲོས་པ་སོ་གཉིས་དང་བྲལ་བ་སྨྲ་བསམ་བརྗོད་པའི་ཡུལ་ལས་འདས་པ་ཉིད་འཕགས་པའི་མཉམ་བཞག་ངང་།   འཛིན་སྟངས་ཐམས་ཅད་ཡོངས་སུ་ཞིག་ཏེ་ཡོན་ཏན་ཐམས་ཅད་འཆར་བའི་གཞི་ལགས་པས།    དེ་ཉིད་མངོན་སུམ་དུ་རྟོགས་པ་ལ་ཆོས་སྐུའི་དགོངས་པ་རྙེད་ཞེས་བརྗོད་དེ།    གང་ཡང་མ་མཐོང་བ་ཉིད་དེ་མཐོང་ཡིན་ཞེས་གསུངས་སོ།   །དེ་ལྟར་ཆོས་སྐུའི་དགོངས་པ་མངོན་དུ་གྱུར་ཏེ་ཉིད་ལས་མི་གཞན་པའི་རང་སྣང་རྒྱ་ཆད་ཕྱོགས་ལྷུང་དང་བྲལ་བའི་འོག་མིན་སྟུག་པོ་བཀོད་པའི་ཞིང་དུ།  ལོངས་སྤྱོད་རྫོགས་པའི་སྐུ་ཡིས་བཀོད་པ་ཕྱོགས་བཅུའི་ཞིང་གི་རྡུལ་སྙེད་ཀྱི་གྲངས་ལས་འདས་པའི་སྐུའི་བ་སྤུས་ཁུང་བུ་རེ་རེའི་གོ་ས་ན།   སངས་རྒྱས་ཀྱི་ཞིང་བྱེ་བ་ཕྲག་བརྒྱར་འགྱེད་པའི་སྐུ་རྣམ་པར་སྣང་མཛད།    གསུང་འོད་དཔག་མེད།   ཐུགས་མི་བསྐྱོད་པ།   ཡོན་ཏན་རིན་ཆེན་འབྱུང་ལྡན།   ཕྲིན་ལས་དོན་ཡོད་གྲུབ་པ་སོགས་རྒྱལ་བ་རིགས་ལྔའི་སྤྲུལ་པ་བསམ་གྱིས་མི་ཁྱབ་པའི་ཡོན་ཏན་ལ་མངའ་བརྙེས་པར་དེ་ཉིད་ལོངས་སྤྱོད་རྫོགས་པའི་སྐུ་ཞེས་ངོས་འཛིན་པ་ཡིན་ནོ།  །ལོངས་སྤྱོད་རྫོགས་པའི་སྐུ་དེ་ཉིད་ལས་མ་གཡོས་བཞིན་རང་བྱུང་རིག་པའི་ཡེ་ཤེས་ཀྱི་རང་རྩལ་འགག་མེད་ཀྱི་ངང་།   མཁྱེན་བརྩེ་ནུས་གསུམ་གྱི་རང་བཞིན་མཚན་བཟང་པོ་སུམ་བཅུ་རྩ་གཉིས་དང་།   དཔེ་བྱད་བཟང་པོ་བརྒྱད་བཅུའི་ཡོན་ཏན་རང་ཆས་སུ་མངའ་བའི་སྐུ་དང་།    གསུང་དབྱངས་ཡན་ལག་དྲུག་བཅུ་སྟེ།  གསུང་གཅིག་ཉིད་དུ་གསུང་མོད་ཀྱང་།   །དུ་མ་ཉིད་དུ་གོ་བར་འགྱུར།  ཞེས་པ་ལྟར་གསུང་གཅིག་གིས་འགྲོ་བའི་རྒྱུད་ཐ་དད་པའི་ཁམས་དབང་བསམ་པ་བག་ལ་ཉལ་སོགས།  གདུལ་བྱ་རང་རང་གི་སྐད་དང་སྐལ་བ་རྗེས་སུ་མཐུན་པའི་གཉེན་པོ་འཆོས་སྐྱོབ་ཀྱི་ཡོན་ཏན་དུ་མ་དང་ལྡན་པའི་གསུང་དང་།    ཟག་པ་མེད་པའི་ཐུགས་རྣམ་པར་ཐམས་ཅད་མཁྱེན་པའི་ཡེ་ཤེས་ཀྱི་ཤེས་བྱའི་དེ་ཁོ་ན་ཉིད་ཇི་ལྟར་བ་དང་།    ཇི་སྙེད་ཀྱི་དོན་སྔོན་དང་ཕྱི་མའི་མཐའ་སྐད་ཅིག་བསྐལ་པ་སོགས་མཁྱེན་པའི་ཡེ་ཤེས་གཅིག་ཏུ་ཟླུམ་པའི་རྡོ་རྗེའི་ཐུགས་དང་ལྡན་པ།    སྐུ་གསུང་ཐུགས་ཡོན་ཏན་ཕྲིན་ལས་དང་བཅས་བསླབ་པ་ལམ་གྱི་གནས་སྐབས་སུ། ཐུགས་བསྐྱེད་དང་སྨོན་ལམ་དུས་ལས་མི་ཡོལ་བར་ཇི་སྲིད་འཁོར་བ་མ་སྟོང་གི་བར་དུ། གདུལ་བྱའི་རྒྱུད་ལ་ཕྲིན་ལས་ཀྱི་འཇུག་པ་རྟག་ཁྱབ་རྒྱུན་མི་ཆད་པར་འབད་མེད་ལྷུན་གྱིས་གྲུབ་པར་མཛད་པའི་རབ་དགའི་ས་ཡིས་རྟོགས་པ་མངོན་དུ་གྱུར་པ་ཡན་ཆད།   ས་ཐོབ་ཀྱི་སེམས་དཔའ་ཁོ་ནར་ངོས་འཛིན་བྱེད་སའི་གཞི་ལགས་པ་དང་།    ཇི་སྐད་བཤད་པའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་སྤྲུལ་པ། བཅོམ་ལྡན་འདས་ཉིད་ཀྱི་ལུང་བསྟན་པའི་འཕགས་ཡུལ་གྱི་གྲུབ་ཐོབ་བརྒྱད་ཅུ་དང་།    གནས་བརྟན་བཅུ་དྲུག   རྒྱན་དྲུག་མཆོག་གཉིས་སོགས་དང་།    བོད་ཡུལ་འདིའང་མཁན་སློབ་ཆོས་གསུམ་དང་།   རྗེ་འབངས་ཉེ་ལྔ་།   མར་མི་དྭགས་གསུམ།   གོང་མ་རྣམ་ལྔ།   རྗེ་ཡབ་སྲས་གསུམ་སོགས་སྒྲུབ་རྒྱུད་ཀྱི་ཤིང་རྟ་ཆེན་པོ་བརྒྱད་ལས་བཀའ་བབ་ཀྱི་ཆུ་བོ་ཆེན་པོ་བཞིའི་གྲུབ་མཐའ་སོ་སོའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ནམ་མཁའི་རྒྱུ་སྐར་གྱི་གྲངས་ལས་འདས་པ་ཞིག་བྱོན་ཏེ།    མཁའ་ལ་བྱ་ལྟར་འཕུར་བ་ཞིང་།    རི་རབ་ལ་ཟང་ཐལ་དུ་འཛུལ་ཏེ་དངོས་མེད་དངོས་པོར་སྒྱུར་བ་དང་།   དངོས་པོ་དངོས་མེད་དུ་སྒྱུར་བ་སོགས་རྫུལ་འཕྲུལ་ཡ་མ་ཟུང་དང་མངོན་ཤེས་ཐོགས་པ་མེད་པར་གྲུབ་པའི་རྟགས་དང་།   མཚན་མའི་མཐོང་སྣང་དུ་གྱུར་པའི་སྤྲུལ་པ་ངོ་མཚར་རྨད་དུ་བྱུང་བའི་མཛད་རྗེས་ད་ལྟའི་བར་དུ་ཡོད་ལ།  དེ་དག་གིས་རྣམ་ཐར་རིང་དུ་དོར་ནས་སྐྱེས་སྦྱོང་གི་ཡོན་ཏན་རྡུལ་ཙམ་མེད་པའི་གང་ཟག་རང་དགའ་བ་ཞིག་ལ་མིང་ཆེན་པོ་ཞིག་གདགས་པར་གྱུར་ན།   འཇམ་མགོན་ས་པཎ་གྱིས་ནོག་དང་ལྐོག་ཤ་མེད་ན་ཡང་།   །ཡ་སོ་ཅན་གྱི་བ་གླང་ཡིན་གསུངས་པ་ལྟར་བསྟན་པ་དང་སེངས་ཅན་གྱིས་དོན་བསྒྲུབ་པའི་ལས་ལ་དམན་ཞིང་།   གནོད་པ་དུ་མ་འཕེལ་བའི་རྒྱུ་ཁོ་ན་ལས་གཞན་གང་ཡང་མེད་དོ།   །མདོར་ན་སྤང་རྟོག་གི་ཡོན་ཏན་ཡོངས་སུ་རྫོགས་པའི་སངས་རྒྱས་ཤིག་ལ་སྤྲུལ་སྐུ་ངོས་འཛིན་དགོས་པ་ལས་ཡོན་ཏན་གང་ཡང་མེད་པའི་གང་ཟག་རང་དགའ་བ་ཞིག་ལ་ངོས་འཛིན་ཏེ་མཚན་གང་ལེགས་ལེགས་ཇི་ལྟར་གསོལ་ཡང་།    དོན་དུ་ཁྱི་རྒན་ཞིག་ལ་སེངྒེ་ཞེས་འདོགས་པ་དང་ཁྱད་ཅི་ཡོད།    དེ་ལྟར་སྟོན་པ་བཀའ་དྲིན་ཅན་གྱིས་ལུང་རྟོག་གི་བསྟན་པ་རིན་པོ་ཆེ་ལ་བྱི་དོར་བྱེད་པའི།  རྒྱུན་ལྡན་གྱི་སྡོམ་བརྩོན་དམ་པ་དགེ་བའི་བཤེས་གཉེན་འདོད་ཆུང་ཆོག་ཤེས་འཕགས་པའི་རིགས་ཤིག་ཡིན་ན།  དེ་ཉིད་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་རློབས་པ་དང་།   ཐུགས་ཀྱི་རྣམ་འཕྲུལ་ཞིག་ཏུ་ངོས་འཛིན་ན་སུས་ཀྱང་བསྙོན་དུ་མེད་ལ།    དེ་ལྟར་མ་ཡིན་པ་མིང་ཙམ་ལ་ཞེན་ནས་རང་ཉིད་སྙན་གྲགས་དང་ལོངས་སྤྱོད་ཁོ་ནའི་ཆེད་དུ་ཐུགས་མཉམ་པར་བཞག་སྟེ།   ཐོས་བསམ་སྒོམ་གསུམ་དང།  འཆད་རྩོད་རྩོམ་གསུམ་སོགས་སྐྱེས་སྦྱོང་གི་ཡོན་ཏན་གང་ཡང་མེད་པར་གཞན་དོན་ལ་ཁ་གཡར་ནས། དོན་དུ་རང་འདོད་ཀྱི་འཁྲི་བ་བཟོད་དཀའ་བ་ཞིག་སྙིང་ལ་བརྣག་སྟེ། སྲིན་བུའི་ཁ་ཆུས་རང་ལུས་འཆིང་བ་ལྟར་རང་ཉིད་ཀྱིས་ཐར་པའི་སྲོག་རྩ་འབྱིན་པར་བྱེད་པའི་སྔོན་སོང་གི་རྒྱུ་ཉེ་བར་སྒྲུབ་སྟེ།   ཐ་སྙད་ཙམ་ལ་ཞེན་ནས་ཡིད་ཆེས་པ་འདིས་ཐོགས་མ་མེད་པ་ནས་ཕུང་བར་ད་དུང་མ་ཤེས་པར།    རང་གིས་རང་བསླུས་པ་འདི་ལས་བསླུ་ཚབ་ཆེ་བ་ཞིག་ཡོད་པ་མ་ལགས་སོ། །ཁ་གཅིག་ཐོས་བསམ་གྱི་དོན་པོ་ཁ་ལ་ཁྱེར་ནས་ཉམས་རྟོགས་ཀྱི་ཡོན་ཏན་རྡུལ་ཙམ་མེད་པར་ཆགས་སྡང་གིས་དུག་ཆུ་སྙིང་ལ་ཁོལ་ཞིང་།   བདག་འཛིན་གྱིས་རྟོགས་པ་གྱེན་དུ་ཕྱུར་ཏེ། ཉམས་རྟོགས་ཀྱི་ཡོན་ཏན་ཏིལ་འབྲུ་ཙམ་ཡང་མེད་པར་ང་རྒྱལ་གྱི་མགོ་འཕངས་དགུང་ལ་བཏེགས་ནས་གཤིན་པོའི་དཀོར་ནག་ཕུར་མ་འགམ་པ་ལྟར་དང་།  གསོན་པོའི་དད་ཟས་ཆོམ་པོས་འཕྲོག་པ་བཞིན་ཁྲམ་གཏམ་དང་ཁ་ཡག་གི་གུར་ཁྱིམ་ཕུབ་སྟེ།   ལོག་འཚོའི་གསོན་དུ་རེ་བ་ཞེ་ཕུགས་སུ་བཅང་བར་དེ་དག་གི་གོས་ཆེན་སེར་པོའི་སོར་ཐར་གྱི་སྡོམ་པ་ཉོས་ནས།   རློམ་སེམས་དང་རང་འདོད་ཡིད་བྱེད་ཀྱི་འཁྲི་བ་རྩད་མ་ཆོད་པའི་བྱང་སེམས་ཀྱིས་བསླབ་པ་བསྲུང་སྟེ།   འདོད་གདུང་དང་ལོག་གཡེམ་གི་བདེ་བས་གསང་སྔགས་ཀྱི་དམ་ཚིག་སོར་ཆུད་པར་བྱས་ནས།   གང་ཆོག་ཆོག་གི་སྤྱོད་པ་ལ་ཞུགས་པའི་བདག་ཅག་གིས་སྟོན་པའི་རྐང་འདྲེན་ཏེ།   ལྟོ་རྒྱབ་ཀྱི་བསྟན་པ་ལ་ཞབས་ཏོག་དང་བྱི་དོར་བྱེད་པའི་འོ་བརྒྱལ་ཆེན་པོའི་ཐུགས་ཁུར་མི་འདོར་བས་དེ་དག་ནི་སྲིད་རྩེ་ནས་མནར་མེད་བར།   འཁོར་བ་ལ་སྤྲུལ་པའི་འགྲོ་དོན་ལུ་གུ་བརྒྱུད་རྒྱུན་མི་ཆད་པར་འབྱུང་བར་གྱུར་ཏེ།   བདག་ཅག་གི་སྟོན་པ་བཀའ་དྲིན་ཅན་གྱིས་ཉིད་ཀྱི་སྐུ་ལས་ཤ་ཡི་རྐང་བུ་སྟོང་བྲུས་ནས། དེ་ལ་འབྲུ་མར་གྱི་སྡོང་བུ་བཙུགས་ཏེ་མེ་ཚོགས་སྤུ་གྲིས་སོ་ཡང་བརྒལ་ཏེ། བསྐལ་པ་གྲངས་མེད་དུ་མར་སྒྲིབ་གཉིས་སྦྱངས་ཤིང་། ཚོགས་གཉིས་ཀྱི་བསོད་ནམས་ལས་རྙེད་པའི་དམ་ཆོས་འཆི་སོས་ཀྱི་བདུད་རྩི་ཆོས་སྐུའི་རིང་བསྲེལ་ཆེན་མོ་དེ་ཉིད་ལ་གཡོ་ཐབས་ཀྱི་ཤོག་དངུལ་བསྒྲུབ་བྱེད་ཀྱི་ལག་ཆ་ལྟ་བུའི་འདུ་ཤེས་སེམས་ནས།   རང་རྒྱུད་ལ་ཡོན་ཏན་གང་ཡང་མེད་པར་ཚེ་འདིའི་སྙན་གྲགས་དང་ལོངས་སྤྱོད་ཁོ་ན་དོན་དུ་གཉེར་ཏེ།   ཆོས་ཚོང་གི་ལས་ངན་བསགས་ནས་རང་བརྒྱུད་ཆུད་ཟོས་སུ་བཏང་བ་འདིར།  ད་དུང་སྣང་མེད་ཀྱི་སྙིང་ཕོད་དང་སྤོབས་པ་ཆེར་བསྐྱེད་པ་ནི་ཐབས་ལ་བསླུ་བའི་བདུད་ཀྱིས་ཟིན་པ་ངེས་པར་ལགས་པས་བློ་ལྡན་རྣམས་ཀྱི་འདི་ལ་བག་ཟོན་མཛོད་ཅིག   གོང་དུ་སྨོས་པ་དེ་ལྟར་ཡང་དག་པའི་ལུང་རིག་གི་དཔྱད་པ་སྔོན་དུ་བཏང་ནས།    གཟོད་སྤྲུལ་སྐུའི་ཐོབ་ཐང་དང་ཆ་རྐྱེན་ཡོངས་སུ་ཚང་བ་ཞིག་ལ་མིང་གི་ཁྱད་པར་ཙམ་བརྗོད་པར་ཡིད་ཆེས་ཀྱི་ཁུངས་བཅོལ་བ་ནི་རང་གཞན་ཀུན་གྱི་ཕན་པ་དང་།   བདེའི་རྒྱུ་ལགས་པས་ཤིན་ཏུ་གལ་ཆེ་བ་ཉིད་དུ་སེམས་པས་རིགས་པ་སྨྲ་བ་ཀུན་གྱི་འདི་ལ་ཐུགས་བསམ་བཞེས་པ་ཞུ།    དེ་མིན་རང་འདོད་དང་ཕྱོགས་རིས་ཀྱི་གཡོ་སྒྱུའི་སྔོན་གྱི་སངས་རྒྱས་དང་བྱང་སེམས་གང་བཟང་བཟང་ཞིག་ཆེད་དུ་འཛིན་ནས།     དེ་དག་གི་སྤྲུལ་སྐུ་འདིའོ་ཞེས་མིང་ལ་བསམ་ནའང་ཐར་པའི་ས་བོན་ཐེབ་ནུས་སྙམ་པའི་ཡོན་ཏན་སྤུ་ཙམ་མེད་པའི་སྟོང་བཏགས་ཞིག་ལ།   བླུན་པོ་རྣམས་བསླུ་བའི་རྫུན་རིས་མཚོན་བྱེད་དུ་ཟ་འོག་གི་ན་བཟའ་ཕྱི་ལ་མངོན་པ་ཞིག་གསོལ་དུ་གཞུག་སྟེ།    ང་རྒྱལ་དང་སེར་སྣའི་རང་གཟུགས་མཚོན་པའི་སེང་ཆེན་བརྒྱད་ཀྱིས་བཏེག་པའི།   ཆོས་བརྒྱད་ཀྱི་ཁྲི་ལ་བདག་འཛིན་གྱི་ཕུང་པོ་གདན་དུ་འཁོད་དེ།   ཆགས་སྡང་རྨོངས་གསུམ་གྱི་རྟོགས་ཚོགས་ལ་ཐུགས་མཉམ་པར་བཞག་སྟེ།    འཁོར་དུ་མཁའ་འགྲོ་མང་པོས་སྐོར་ནས་དེ་དག་ལ་སྐུ་གསུང་ཐུགས་ཀྱི་སྲས་དཔག་ཏུ་མེད་པའི་ཁ་རྒྱབ་ཀྱི་བསྟན་པ་ལ།  སྐུ་ཚེའི་འདུ་བྱེད་མ་གཏང་གི་བར་དུ་འགྲོ་དོན་རྒྱུན་མི་ཆད་པར་མཛད་དེ།   སྔོན་བསགས་བསོད་ནམས་ཀྱི་ཚོགས་ལས་ལོག་འཚོའི་ཟས་ཀྱིས་ཕྱུག་པའི་འབྱོར་ལྡན་གྱི་ཡོན་བདག་དང་།   འཕགས་པའི་ནོར་གྱིས་སྟོང་བའི་སྤྲང་པོ་གཉིས་དུས་གཅིག་ཏུ་ཚོགས་ནས།   གང་འདོད་ཡིད་ལ་བསྒྱུར་བའི་རྣམ་སྨིན་གྱི་འབྲས་བུ་ལན་གཅིག་ཏུ་སྤྱད་དེ།   འཕེན་བྱེད་དགེ་བས་འཕོངས་པ་ལ་རྫོགས་བྱེད་སྡིག་པས་རྫོགས་པར་འདི་དག་ནི་ཤིན་ཏུ་ཕངས་ཤིང་ཡ་ང་བའི་གནས་སུ་འགྱུར་བ་ཞིག་མ་ལགས་སམ།  

  གལ་སྲིད་ནོར་ལོངས་སྤྱོད་ལ་སྙིང་པོ་ཞིག་ཡོད་ན།   སྟོན་པ་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེས་མ་གཟིགས་པར་རྒྱལ་སྲིད་མཆིལ་མའི་ཐལ་བ་བཞིན་དོར་བར་དོན་མེད་པ་ཉིད་དུ་ཅིའི་ཕྱིར་དུ་མི་འགྱུར།    མདོར་ན་སྟོན་པ་བཀའ་དྲིན་ཅན་གྱི་རྗེས་འཇུག་ཞིག་ཡིན་ཕྱིན་ཆད་བསྟན་པའི་འཁོར་ལོ་རྣམ་གསུམ་སྟེ།   ཀློག་པ་ཐོས་བསམ་གྱི་འཁོར་ལོ།   སྤོང་བ་བསམ་གཏན་གྱི་འཁོར་ལོ།   བྱ་བ་ལས་ཀྱི་འཁོར་ལོ་གསུམ་ལ་འཇུག་པ་ལས་གཞན་འཇིག་རྟེན་གྱི་ལྟ་སྤྱོད་ལས་འདས་པ་ཁོ་ན་ཞིག་མ་གཏོག  ཆོས་དང་འཇིག་རྟེན་ལྷན་ཅིག་ཏུ་བདག་ཅག་གི་སྟོན་པས་ཀྱང་འགྲུབ་པར་མ་མཁྱེན་པས།   དེང་དུས་བླ་སྤྲུལ་སེར་མོ་བ་མང་ཆེ་བས་ཁྱིམ་པའི་ལས་འབད་པ་ཁོ་ནས་དུས་འདའ་བ་སྣང་ངོ་།    འདི་ལ་བརྗོད་དགོས་པ་མང་ཡང་ཡིག་ཚོགས་མང་བར་དོགས་པས་གཞན་དུ་བརྗོད་པར་བྱའོ།   གང་ལྟར་ཡང་རབ་ཏུ་བྱུང་ན་སྤྲུལ་སྐུ་དེ་མིང་དོན་དང་འབྲེལ་བའི་གྲུབ་པའི་རྟགས་དང་། དུས་གསུམ་མཁྱེན་པའི་མངོན་ཤེས་ཐོགས་པ་མེད་པའི་ཡོན་ཏན་གྱིས། འགྲོ་བའི་རྒྱུད་ཡོངས་སུ་སྨིན་པའི་དངོས་རྒྱུ་ཐུན་མོངས་མ་ཡིན་པ་ཞིག་མངའ་བ་ལ་རགས་ལས་པ་དང་ཚད་བཟུང་བ་ཞིག་ངེས་པར་དགོས་ལ།  དེ་ལྟར་མེད་རུང་རྒྱལ་བའི་ཕྲིན་ལས་ཀྱི་ཐུགས་རྗེ་དང་། བྱིན་རློབས་འཇུག་པའི་རྒྱུ་ཡི་གཙོ་བོ་ལུང་རྟོགས་ཀྱི་ཡོན་ཏན་ལ་རང་བྱན་ཚུད་པའི་བཤད་སྒྲུབ་ཀྱི་བསྟན་པ་འཛིན་པའི་སྐྱེས་ཆེན་དམ་པ་ཞིག་ཡིན་ན།  དེ་ཉིད་ངེས་པར་དོན་གྱི་སངས་རྒྱས་དང་བྱང་ཆུབ་སེམས་དཔའི་རྣམ་རོལ་ཞིག་ངོས་འཛིན་ན་མ་ཆོག་པ་མེད་ལ། །སྔོན་གྱི་སྤྲུལ་སྐུ་གོང་མ་རྣམས་དང་དེང་སང་དེ་རྣམས་ཀྱི་ཡང་སྲིད་དང་བསྡུར་ན། ཕྱོགས་གང་ནས་ཀྱང་གོང་མ་དེ་དག་གི་ཡོན་ཏན་གྱི་ཆ་ཙམ་ཡང་གཞལ་དུ་མ་མཆིས་པས།  དོན་དངོས་ཐོག་དེང་སང་གི་ཡང་སྲིད་དེ་དག་ཇེ་ཡག་ཇེ་བཟང་དུ་མ་སོང་ནའང་། ཇེ་སྡུག་དུ་འགྲོ་བ་འདི་དོན་འདིར་བསམ་ན་དེ་དག་ལ་ཡིད་ཆེས་ཀྱི་ཁུངས་གང་ཡང་མི་འདུག   སྔོན་གྱི་གོང་མ་དེ་དག་ལ་དུས་གསུམ་མཁྱེན་པའི་མངོན་ཤེས་དང་རྫུལ་འཕྲུལ་གང་ལ་ཡང་།  ཐོགས་པ་མེད་པའི་རྟགས་དང་མཚན་མ་སྟོན་རྒྱུ་ཡོད་པས་དེ་དག་གིས་ཡང་སྲིད་སྤྲུལ་པ་ཞིག་དངོས་ཡིན་ན། གོང་མ་ལས་ལྷག་པའི་ཡོན་ཏན་ཞིག་མེད་ན་ཡང་ཇེ་སྡུག་དུ་འགྲོ་བ་འདིར་སུ་ཞིག་ཡིད་ཆེས་པར་གྱུར། སྔོན་གྱི་གོང་མ་རྣམས་ཀྱི་ཐབས་དང་གོ་སའི་མིང་གི་ལྷག་མ་ཙམ་དུ་འཛིན་པ་ལ།  ཡིད་ཆེས་ཀྱི་རེ་ལྟོས་བྱེད་དགོས་ན་གང་ཟག་སུ་ལ་ཡང་མིང་དེ་འདོགས་ཆོག་ཆོག་ལགས་པས་དོན་དུ་ཡོན་ཏན་གྱི་ཁྱད་པར་ལ་རགས་ལས་དགོས།  སྤྲུལ་སྐུའི་ཡང་སྲིད་ངོས་འཛིན་བྱེད་པའི་བླ་མ་དེ་ཡང་དུས་གསུམ་མཁྱེན་པའི་མངོན་ཤེས་ཐོགས་པ་མེད་པའི་ཡོན་ཏན་ལ་རང་དབང་འབྱོར་བའི་ཡེ་ཤེས་ཀྱི་སྤྱན་དང་ལྡན་པ་ཞིག་ལ་རགས་ལས་དགོས་པ་མ་གཏོགས།   རང་འདོད་ཀྱི་ལོང་བས་ལག་སྙོབ་ལྟར་ཚོད་བགམ་གྱི་བྱ་བ་ལ་ཡིད་ཆེས་རྙེད་པའི་ཁུངས་གང་ཡང་མེད།   གལ་སྲིད་སངས་རྒྱས་དང་བྱང་སེམས་ཀྱི་སྤྲུལ་པ་ཞིག་གདུལ་བྱའི་བསོད་ནམས་ཀྱི་དཔལ་དུ་བྱོན་ཡོད་ན།   དེ་དག་ངོས་འཛིན་མ་བྱས་ཀྱང་བལྟམ་མ་ཐག་ཡོན་ཏན་གྱི་རྟགས་རང་ཆས་སུ་མངའ་བས།   དུ་བ་ལས་ནི་མེ་ཤེས་དང་།  །ཆུ་བྱ་ལས་ནི་ཆུ་ཤེས་ལྟར།  །བྱང་ཆུབ་སེམས་དཔའ་བློ་ལྡན་དག  །རིགས་ནི་ཚད་མ་དག་ལས་ཤེས་གསུང་པ་ལྟར་དང་།  འཇིག་རྟེན་པའི་ཁ་སྐད་ལས་ཀྱང་ཡ་རབས་མ་རབས་སྤྱོད་པས་ཤེས།   །ས་ཆ་གང་ཡིན་སྐད་ཀྱིས་ཤེས་ཟེར་བ་ལྟར་དེ་དག་ནི་ངོས་འཛིན་མ་བྱས་ཀྱང་།   ཡ་རབས་ཀྱི་རྟགས་དང་ཡིད་ཆེས་པའི་ཡོན་ཏན་རང་ཆས་སུ་ལྡན་པའོ།   དེང་གི་དུས་འདིར་སྤྲུལ་སྐུ་ངོས་འཛིན་བྱེད་ཚུལ་རྣམ་པར་མང་ཙམ་ཞིག་ཐོས་པས་འདི་ལྟར།    ཕྱུགས་པོས་ནོར་གྱི་སྤྲུལ་སྐུ།   བཙན་པོ་དཔོན་གྱི་སྤྲུལ་སྐུ།   ཁ་མཁས་གཏམ་གྱི་སྤྲུལ་སྐུ།   མགོ་བདེའི་ཐབས་ཀྱི་སྤྲུལ་སྐུ་སོགས་སྤྲུལ་སྐུའི་ས་སྟེང་ཁྱབ་པ་ཞིག་གྲགས་མོད།  དེ་དག་ནི་སངས་རྒྱས་ཀྱི་བསྟན་པ་ཉམ་པར་བྱེད་པའི་བསྟན་པའི་ཆོམ་རྐུན།   བསྟན་དགྲ་བདུད་ཀྱི་བྱིན་གྱིས་རློབས་པ་ཤ་སྟག་ལགས་པས་རིགས་པ་སྨྲ་བའི་རྣམ་དཔྱོད་དང་བློ་གྲོས་ལྡན་པ་རྣམས་ཀྱིས།    དེ་དག་སྟོན་པ་བཀའ་དྲིན་ཅན་གྱི་ཞི་སྒོ་གཉིས་སུ་མེད་པའི་བསྟན་པ་ལ་རྫུས་ནས་ཁ་གཡར་བ་ལགས་པས།  ལུང་དང་རིག་པས་སུན་ཕྱུང་སྟེ་གནས་དབྱུང་བར་མཛོད་ཅིག     ཁོ་བོས་འདི་དག་བརྗོད་པ་ལ་ཕྲག་དོག་དང་གཡོ་སྒྱུའི་རྫུན་བག་གིས་འཇུག་པ་ཞིག་གཏན་ནས་མ་ལགས་ཏེ། བདག་ནི་སྟོན་པ་བཀའ་དྲིན་ཅན་གྱིས་བསྟན་པ་འདི་ལ་སྙིང་ཐག་པ་ནས་མི་ཕྱེད་པ་ཡིས་དད་པ་ཞིག་ཡོད་པས།   དེང་གི་དུས་འདིར་སྟོན་པའི་བསྟན་པ་ལ་ཐུགས་བསམ་བཞེས་པ་ནི་ཆེས་ཤིན་ཏུ་དཀོན་པས་ཕྱིན་ཅིང་ལོག་གིས་སྤྱོད་པ་ལ་དོགས་ནས།   ཅུང་ཟད་ཕན་ནམ་སྙམ་པའི་ཀུན་སློང་གི་ལྷག་བསམ་མི་འདོར་བས་བྲིས་པ་ལགས་པས་འདི་ལ་ངག་འཆལ་གྱི་ནོངས་པ་གང་མཆིས་གཟུར་གནས་མཁྱེན་ལྡན་རྣམས་ཀྱིས་སྤྱན་སྔར་འཆགས་སོ།     སླར་སྨྲས་པ།    དམར་སེར་ལི་ཁྲིའི་མདངས་འཕྲོགས་འདུས་སྡེའི་དབུས།   གཙུག་ལག་བྱེ་བས་གཏམ་པའི་སྡོམ་བརྩོན་མཆོག  །བཤད་བསྒྲུབ་ཉིན་མོར་བྱེད་པའི་སྣང་བ་ཡིས།  །ཐུབ་བསྟན་མཛེས་པའི་རྒྱན་དེ་སླར་ཡང་དྲན།   དེང་དུས་ཆོས་པའི་གཟུགས་བརྙན་འཛིན་མཁས་རྣམས།  །རང་མགོ་མི་ཐོན་གཞན་མགོ་འདོན་ལ་བྲེལ།  །རང་རྒྱུད་མེད་པའི་ཁ་ལྟ་མཐོན་པོར་སྒྲོག  །མི་ཆོས་བླ་མའི་རྫུན་གྱིས་འཇའ་ཚོན་བཀྲ།  །ཆོས་ལ་དྲེད་པའི་པཎ་ཞུ་དབུ་ལ་མཛེས།   །སྡོམ་གསུམ་རལ་པའི་ངུར་སྨྲིག་སྐུ་ལ་གསོལ།   །ལོག་འཚོའི་ཟས་རིགས་མང་པོའི་ལྟོ་བ་རྒྱན།  །སྙིགས་དུས་གང་ཟག་གདོན་གྱིས་རློམ་པར་སྐྱོ།  །ཆོས་བརྒྱད་གྲུབ་པར་བརྙེས་པའི་རྟོགས་ལྡན་འགས།  །ཚོགས་དྲུག་རྐྱེན་ལ་ཤོར་བའི་ཉམས་ལེན་གྱིས།  །མ་རིག་བདག་ཏུ་འཛིན་པའི་མཉམ་བཞག་ངང་།  །འདོད་རྔམ་རེ་དོག་རྟོགས་པ་རང་བྱུང་རྡོལ།  །འདོད་པའི་ཁམས་འདིར་འདོད་ཡོན་རྣམ་མང་བས།  །ཇི་ཙམ་སྤྱད་ཀྱང་དེ་ཙམ་སྲེད་པ་འཕེལ།  །སྤྱད་པ་ལས་ཀྱང་སྲེད་པ་སྡིག་ཆེ་བས།   །ཆོག་ཤེས་མེད་པའི་འདོད་སེམས་ཚིམ་དུས་ཅི།  །ལོག་འཚོའི་གསོན་པའི་ཚེ་འདིའི་དཔལ་ཡོན་གྱིས།  །མིང་གིས་གྲགས་པ་ཀུན་ལ་ཁྱབ་ན་ཡང་།  །དོན་ལ་ཡོན་ཏན་སྤུ་ཙམ་མེད་པས་ན།   །རང་གཞན་ཀུན་གྱིས་འཕྲལ་དུ་སྤོངས་བར་རིགས།   །དེ་ལྟར་བསམ་ནས་ཚེ་འདིའི་འབྱོར་རྒུད་ལ།  །སྙིང་པོ་གང་ཡོད་ད་ནི་ཤེས་ཚོད་ཀྱིས།  །དགེ་སྡིག་རྒྱུ་འབྲས་ཆོས་ལ་ཡིད་ཆེས་ནས།  །ཡང་དག་དོན་གྱི་སྙིང་པོར་བཞོལ་པར་གཅེས། ། 

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1