གཙོ་ངོས།>> རྩོམ་རིག>>ལྷུག་རྩོམ།

རྩོམ་སྒྲིག་པ།ཡོང་ཁུངས། སྤེལ་དུས། ༢༠༡༥ལོའི་ཟླ་བ་༠༢ཚེས་༠༢ཉིན།

༄༅། །ཉག་ཨ་འཛི་རོང་གི་གནམ་ལོ་གསར་བ་ལ་ལེགས་སྐྱེས།

མི་ལ་དཔལ་ཆགས་ཚེ་རིང་ལོ་བརྒྱ་ཐོབ།།

ཁྱིམ་ལ་གཡང་ཆགས་ལོངས་སྤྱོད་ཕུན་སུམ་ཚོགས།།

ཟས་ལ་བཅུད་ཆགས་མངའ་ཐང་རིགས་རྒྱུད་དར།།

ནོར་ལ་བྱིན་ཆགས་གང་འདོད་ལྷུན་གྱིས་གྲུབ།།

 

ཨ་སྔོན་དགུང་ནས་ཉི་ཟླ་སྐར་གསུམ་ཚེས།།

དོག་མོ་ས་ནས་ཆབ་དཔལ་རིག་གསུམ་རྒྱས།།

སྐྱིད་པའི་ཁྱིམ་ན་ཕ་མ་མིང་སྲིང་འཛོམས།།

གནམ་ལོ་གསར་བ་སྐྱིད་པའི་ཁྱིམ་ན་རོལ།།

 

མཐོན་པོའི་སྒང་ལ་ལྷ་བསང་དཀར་པོ་བཏང་།།

དམའ་མོའི་ཐང་ལ་རྟ་རྒྱུག་བང་རྩལ་འགྲན།།

དར་ལྕོག་དམར་པོ་བཙན་པོའི་ལྷ་ལ་བཙུགས།།

གནམ་ལོ་གསར་བའི་རླུང་རྟ་དགུང་དང་མཉམ།།

 

སྟག་ཤར་གཞོན་ནུ་གླུ་དབྱངས་ལེན་ལ་སྤྲོ།།

སྨན་ཤར་བུ་མོ་ཞབས་བྲོ་འཁྲབ་ལ་དགའ།།

ན་ཆུང་བྱིས་པ་བཟའ་བཏུང་རོལ་བར་སྐྱིད།།

གནམ་ལོ་གསར་བ་སྤྲོ་དགའ་སྐྱིད་ཀྱིས་བསུ།།

 

བརྩེ་ལྡན་ཕ་ལོ་ཐབ་ཀྱི་གཡས་ན་བཞུགས།།

བྱམས་ལྡན་མ་ལོ་ཐབ་ཀྱི་གཡོན་ན་བཞུགས།།

ཁྱིམ་གྱི་ཕྱི་ནང་སྐྱིད་པའི་དགོད་སྒྲས་གང་།།

གནམ་ལོ་གསར་བ་སྒང་པ་བོད་ལ་ཚེས།།

 

བཙན་པོའི་སྐུ་མཁར་དབུས་གཙང་ཡུལ་ན་མཐོ།།

ཤེས་རིག་སྒྲོན་མེ་ཨ་མདོ་ཡུལ་དུ་འབར།།

སྙིང་སྟོབས་ཆོད་སེམས་ཁམས་པའི་ཡུལ་དུ་བརྟན།།

གནམ་ལོ་གསར་བ་ཆོལ་གསུམ་བོད་ལ་ཤར།།

 

མར་ཆུར་ཞོ་གསུམ་སྡེར་ཁ་འབྲོག་ན་མཐོ།།

ཀ་སྦྲང་བུ་གསུམ་སྡེར་ཁ་རོང་ན་མང་།།

མངར་སྐྱུར་ཁ་གསུམ་སྡེར་ཁ་ཁྲོམ་ན་འཛོམས།།

གནམ་ལོ་གསར་བ་ནང་མི་སྤུན་ཟླས་རོལ།།

 

དགེ་རྒན་དམ་པ་གནའ་དེང་གཉིས་ལ་འབྱོར།།

ན་གཞོན་སློབ་མ་ཤེས་རིག་རྩལ་གྱིས་རྫོགས།།

ཤེས་རིག་སློབ་གླིང་འཛམ་གླིང་ཅན་ལ་ཕྱོགས།།

གནམ་ལོ་གསར་བ་ལྔ་རིག་གླིང་ལ་ཚེས།།

 

ཁ་པར་ནང་ནས་ཁ་གཡང་སྙན་མོ་སྒྲོག།

འཕྲིན་ཕྲན་ནང་ནས་རྟགས་བརྒྱད་རི་མོ་སྐུར།།

པོད་ཕྲན་ནང་ནས་སྨོན་ཚིག་ལེགས་སྐྱེས་ཕུལ།།

གནམ་ལོ་གསར་བ་བརྡ་འཕྲིན་ཁྲོད་དུ་སྐྱེལ།།

 

རླུང་རྟ་ལེབ་མོ་ཨ་སྔོན་དགུང་ལ་གཏོར།།

འབྲུ་རིགས་སྣ་ལྔ་འགོ་བའི་ལྷ་ལ་མཆོད།།

རྟེན་འབྲེལ་ཁ་གཡང་ཁ་བ་ཅན་ལ་འབོད།།

གནམ་ལོ་གསར་བ་རེ་སྒུག་ཁྲོད་དུ་ཚེས།།

 

བརྩེ་བ་དམར་པོ་མེ་ལྕེ་བཞིན་དུ་མཆེད།།

དུང་བ་ཟབ་མོ་འོ་མ་ལས་ཀྱང་དཀར།།

ཚོད་འཛིན་དཀའ་བའི་ལྷད་མེད་བརྩེ་དུང་འདི།།

གནམ་ལོ་གསར་བར་ཕུལ་བའི་ལེགས་སྐྱེས་ཡིན།།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1