གཙོ་ངོས།>> རྩོམ་རིག>>སྙན་རྩོམ།

རྟའུ་རང་ཤར་རིག་པས། རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། ༢༠༢༠ལོའི་ཟླ་བ་༠༣ཚེས་༡༦ཉིན།

༄༅།། རིམས་འགོག་པའི་སྙིང་སྟོབས།

 རྟའུ་རང་ཤར་རིག་པས།





ལྷག་བསམ་གཙང་མས་འགན་འཁྲི་ཕྲག་ཏུ་བཞེས།།
ཟས་བརྗེད་གཉིད་ཆགས་བློ་རྩེ་གཅིག་སྒྲིམ་གྱིས།།
ཏོག་གསར་གློ་ཚད་ནད་དུག་འགོག་རྒོལ་ལ།།
གཡུལ་སར་ཞུགས་པའི་ལྷ་རྗེ་ངོ་སོ་བསྟོད།།



ལྷགས་རླུང་བུ་ཡུག་རྒོད་པའི་གྲང་ངར་ཁྲོད།།
འཁྱག་དུབ་ངལ་བས་གཙེས་ཀྱང་ཞུམ་མེད་ངང་།།
རིམས་འགོག་ལས་ཀ་གཅིག་ཏུ་གཙིགས་འཛིན་པའི།།  
མི་དམངས་ཁྲིམས་འཛིན་མི་སྣ་ཨེ་མ་རྨད།།



ཕྲག་ཏུ་བབས་པའི་འོས་འགན་བདག་གིར་བཞེས།།
མི་འདོད་ནད་ཡམས་འགོས་བའི་ནད་པ་རྣམས།། 
ཉིན་དང་ཞག་དུས་བྱམས་དང་བརྩེ་བས་བསྐྱངས།།
དམངས་ཀྱི་ལས་བྱེད་འདི་དག་སྙིང་སྟོབས་ཆེ།།



རིམས་ནད་བཙན་པོས་འགྲོ་འོང་བཀག་ནའང་།།
གཉེན་ལྟར་གཅེས་ཤིང་བྱམས་པའི་ལས་སྒྲུབ་པས།། 
དམངས་ཀྱི་འདོད་བློ་བཞིན་དུ་མཁོ་དངོས་དག།
ཁྱིམ་གྱི་སྒོ་དྲུང་སྐྱེལ་བའི་སྤྱོད་མཆོག་བསྔགས།།



བཀའ་ཡིས་བཀོད་པ་འཕྲུལ་གྱི་རང་བཞིན་དང་།།
ལག་ལེན་གནད་དུ་འཁེལ་བའི་གོ་སྒྲིག་གིས།།
མ་རུངས་རིམས་ནད་དྲག་པོ་ཆམ་ལ་ཕབ།།
དམངས་ཀྱི་དབུ་ཁྲིད་རྣམ་པར་འོ་བརྒྱལ་ཞུས།།



ཉིན་མཚན་དབྱེར་མེད་དམངས་ཀྱི་བདེ་ཐང་ཆེད།། 
དྲོད་ཚད་བརྟག་དང་དུག་གསོད་ལས་ཀ་སོགས།།
གོང་རིམ་བཀའ་ལྟར་ལས་ལ་འབུངས་བཞིན་པའི།། 
ཞག་སྡོད་ཏང་ཡོན་རུ་དཔུང་མངོན་པར་བསྟོད།།



གཅེས་པར་འོས་པའི་རྒྱ་ཆེན་མང་ཚོགས་ཀྱིས།།
ཚན་རིག་ལྟ་བའི་རིམས་ནད་འགོག་བཅོས་ལ།།
རང་ནུས་ཡོད་རྒུ་བཏོན་ནས་རྒྱབ་སྐྱོར་དང་།། 
ཁ་མིན་དོན་གྱིས་ཕ་ཡུལ་སྲུང་བ་མཚར།།



མདོར་ན་ཐེངས་འདིའི་རིམས་འགོག་གཡུལ་འཐབ་ཁྲོད།། 
དཀའ་བ་ཁྱད་བསད་ངལ་བ་དང་བླངས་པའི།།
ཡུལ་མི་ལྔ་ཁྲི་བརྒྱད་སྟོང་ཐམས་ཅད་ཀྱི།། 
རྟའུ་རིམས་འགོག་སྙིང་སྟོབས་རྒྱལ་གྱུར་ཅིག།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1